A Casa di Roccapina

Mapa d'accessu

sur la RN 196 entre Sartene et Bonifacio
20100 Sartene
04 95 71 56 30
04 95 77 01 09
www.cg-corsedusud.fr/patrimoine-et-culture/a-casa-di-roccapina
GPS : 41.498791,8.948839


L'anziana casa cantunera, rinuvata da u Cunsirvatoriu di u liturale è gistitu da u Cunsigliu Generale di a Corsica Suttana, prisenta una mostra-spettaculu. Inde l'anziana casa cantunera di Roccapina, vinite à sente à Jane, « figliola di u lione », cuntà vi tuttu quessa.
À l’intrata, pigliate vi una audioguida : « Roccapina, tanti anni senza vede ti... ». Una voce, quella di Jane... è Roccapina si raconta : in giru à una riprisentazione maiò di u situ, i ritratti è l'ogetti ramentanu quelli chì camponu quì, in la casa, quelli chì ci passavanu è ci passanu sempre, pastori, duganeri, turisti...
Po hè un saltu fantasticu in lu bughjone, è ne affaccanu un lione, un elefante, un orsu è altre criature, chì, in lu timpurale, si discetanu da u so sonnu di petra... È torna rughja u lione !
À u pianu supranu, d'altre riprisintazione danu chjave par capisce : cumu ella hà pussutu inghjinnà a natura issi tafoni strasurdinarii chì fecenu u lione o l'elefante di Roccapina ? Cumu elli si sò ghjuvati l'omi di issi tafoni da tempi è tempi ?
Da l'agrondu preistoricu à u ricovaru di u girandulone, u tafonu assistatu, l'oriu, si hè fattu casa par accoglie l'omu è a so famiglia, sepultura par prutege lu dopu mortu, furtezza in li tempi di cumbugli, piazzile ch'ellu pudessi stà à vicinu à a so banda.
Dui chjassi parmettenu di pruseque a visita à l'infora :
U caminu di l'oriu hè una parte di u parcorsu di visita di a casa cantunera. Una spassighjatella di 20 mn, audioguidata, da entre propiu in lu mondu stupendu di i tafoni, in sinu à l'oriu ricustituitu di Roccapina.
U chjassu di u Belvedere, u caminu di a punta, libaru d'accessu, hè un ciottu in a machja di 45 mn : Ci si scoprenu unepoche di maraviglie ch'ella si avia manghjatu a machja, chjostri scurdati, orii tralasciati ; ma ancu una sapara da sottu à l'elefante è in più bella un belvedere chì lascia a vista supranà l'orizonte.
Apri u marti à a dumenica 10h à 18h. Tariffa : piena 2€/ridutta 1€